Кралицата Елизабета Втора несомнено е една од најзаштитените личности во светот и наводно, нејзините електронски уреди е невозможно да се хакираат.
Имено, 95-годишната кралица користела мобилен телефон од марката „Samsung“ кој е заштитен од МИ6, а за полнење на батеријата е задолжен личниот асистент на кралицата.
„Кралицата најмногу го користи за да разговара со нејзината ќерка, принцезата Ана, и менаџерот на коњски трки Џон Ворен“, рече Џонатан Сакердоти, експерт за кралското семејство во подкастот на „THE ROYALLY US“.
Кралицата го познава Ворен преку покојниот пријател, грофот Карнарвон, чиј зет е Џон.
Иако во последно време кралицата не се чувствувала добро и лекарите ја советувале да не се напрега, таа сепак ќе биде домаќин на семејството за Божиќ.
„Кралицата рече дека се чувствува многу подобро и дека се радува на пречекот на своите гости за Божиќ“, изјави извор за „Daily Mail“, а кралицата ќе ги дочека празниците без принцот Хари, Меган и нивните две деца.
Минатата година беше полна со драматични настани за кралското семејство, а за кралицата ова ќе биде прв Божиќ без принцот Филип и внукот Хари.
