(ФОТО СТОРИЈА) СО ЉУБОВ РАСТЕ ЖИВОТ: Марија ни ги отвора вратите на дворот во кој постојано нешто цвета

од М. Г.11:02 - 8 декември, 202112:08 - 8 декември, 2021

Денешниот разговор се одвива со Марија Петреска која од месецот јули е пензионерка. Таа е мајка, свекрва и баба на 5 внучиња. за себе вели дека покрај љубовта за семејството и внучињата, голема љубов ѝ се и цвеќињата.

– Дворот се наоѓа во Драчево и има околу 400 квадрати за цвеќе и тревници. Тука е и базенот монтажен во кој внучињата уживаат цело лето. За уредувањето на дворот заслугата е заедничка со сопругот, и тој е пензионер, и се договараме и надополнуваме со идеите и обврските – ни вели Марија.

Марија ни раскажува за раскошот на дворот и животот во него.

– Во дворот има многу цвеќиња, сезонски и повеќегодишни. За многу од цвеќињата сами си произведуваме расад како за љубичиците и летните цвеќиња. Некои ги размножуваме со гранчиња, компирчиња, а исто така многу се разменуваме и со пријателките.

– Љубителка сум на кактуси сукуленти, собни зелени цвеќиња и многу цветни. Сите ги сакам и на сите им се радувам! Преку цело лето е шарено во дворот. Сè нешто цвета. Од есен до месецот мај цветаат љубичиците, а преку летото сезонските. Најмногу ме радуваат бугенвилијата, бегониите, индиските јорговани, клематисите, сарделите на Есен, хризантемите или есенски цвеќиња – продолжува таа.

За да биде убаво има многу работа, но тоа нè релаксира не нè заморува.

Сега со пандемијата тоа ни доаѓа како издувен вентил.

Зимата е вистински предизвик во нивниот дом.

– За преку зимата имаме проблем затоа што се многубројни цвеќињата. Можеби има повеќе од 250 саксии, па сместуваме нешто во домот, нешто по подруми. Сопругот е тој што се грижи најмногу за преку зимата. Еве, сега работи на новогодишно украсување на дворот.

– Сега живееме во време на изолација заради пандемијата. Интернетот ни е добра комуникација. Членка сум на групата … ДВОРЧЕТО … каде со многу цветни пријателки споделуваме идеи, совети и цвеќиња.

За сите оние кои го сакаат цвеќето мој совет да си го одгледуваат затоа што убавината со кое враќа ја полни душата и ве прави среќни, е градинарскиот совет на Марија.