Васил Гарванлиев, кој веќе неколку години живее во Чикаго, го одбележа католичкиот Божиќ во топла, семејна атмосфера, заедно со сопругот Џејсон и нивните миленици.
Пејачот на социјалните мрежи сподели низа фотографии од нивниот дом, уреден во вистински празничен стил. Посебно внимание привлекоа двете новогодишни елки – едната сместена во дневната соба, украсена со впечатливи црвени машни, додека другата е во посмирена, елегантна палета, со бели и неколку црни лампиони.
На фотографиите, Васил и Џејсон позираат во исти зелени пижами, а дел од празничната идилична сцена се и нивните миленици – две кучиња и една мачка, кои, исто така, „позираат“ пред камерата.
Во описот на објавата, Гарванлиев напиша и емотивна порака до своите следбеници, истакнувајќи ја благодарноста за поддршката и љубовта што ја добиваат.
„Немам зборови… колку е вредна оваа слика и колку сме благодарни на секој еден од вас што е дел од нашите животи. Ви посакуваме прекрасна празнична сезона“, напиша Васил.
