Македонската пејачка и мејкап артистка Зои Блаж деновиве го посети манастирот Острог во Црна Гора, а во едно од најпознатите православни светилишта во регионот беше заедно со сопругот Тадеј Матијашиќ и нивната ќеркичка Мариа.
Зои сподели моменти од семејната посета на социјалните мрежи, а покрај фотографијата од Острог остави кратка порака исполнета со благодарност.
„Фала ти за сè. Мир Божји“, напиша таа.
Посетата на Острог има посебно значење за Зои, која во изминатиот период отворено зборуваше за својот пат до мајчинството и за предизвиците низ кои поминала пред да ја добие ќеркичката.
По долгата борба да стане мајка, Зои минатата година ја оствари својата голема желба и ја доби Мариа.
Сега, заедно со сопругот и нивното девојче, таа го посети светилиштето посветено на Свети Василиј Острошки.
Манастирот Острог, вграден во карпите над Бјелопавлиќката Рамнина, е едно од најзначајните православни светилишта на Балканот.
Во него се чуваат моштите на Свети Василиј Острошки, а секоја година го посетуваат голем број верници кои доаѓаат да се поклонат и да се помолат за здравје, мир и благослов.
