Македонската модна дизајнерка Ива Спасовска го одбележа својот 36. роденден во Чикаго, градот во кој живее повеќе од шест месеци, организирајќи интимна, но стилски прецизно осмислена забава во домашна атмосфера.
Прославата била во знак на белата боја – од декорацијата до дрес-кодот. Просторот бил украсен со бели балони и минималистички детали, додека трпезата изобилувала со внимателно аранжирани специјалитети, торта со јагоди и златни свеќички.
Спасовска избрала впечатлив стајлинг инспириран од естетиката на Џеки Кенеди – бел костум со префинета линија, мал шешир и бели дизајнирани хулахопки, со што целосно ја заокружила концепцијата на вечерта. Фотографиите што ги сподели на Инстаграм откриваат внимателно осмислен амбиент и опуштена атмосфера меѓу гостите.
Меѓу присутните биле нејзини пријатели од Чикаго, кои ги запознала во изминатиот период, како и нејзината најдобра другарка од детството, која со години живее во САД.
„Срце полно радост“, напиша дизајнерката во описот на објавата, дозволувајќи им на следбениците да ѕирнат и во приватниот дел од домот – аголот каде се шминка, ја чува козметиката и личните ситници.
