Љубовната врска меѓу младите пејачи Џејла Рамовиќ и Јаков Јозиновиќ, за која со недели се шпекулираше, конечно е потврдена, а во јавноста повторно се актуелизираа изјавите што пејачката ги даде за него уште пред да признаат дека се заедно.
Двојката неодамна престана да ја крие својата љубов, откако Јозиновиќ на социјалните мрежи објави видео од нивниот заеднички одмор. На снимката се гледа како двајцата разменуваат бакнежи на јахта, со што ги потврдија гласините за нивната романса.
Уште претходно, гостувајќи во емисијата „Амиџи шоу“, Џејла отворено зборуваше за својот четири години помлад колега и не криеше колку го цени.
„Јаков едноставно ја има таа харизма и нешто што им се допаѓа на луѓето. Со сите се карам, ако некој почне лошо да ми зборува за него, веднаш се расправам“, изјави тогаш Џејла, додавајќи дека тој носи „нешто сосема ново“ на музичката сцена.
Пред да стане позната нивната врска, Џејла Рамовиќ беше поврзувана и со пејачот на групата „Џокер аут“, Бојан Цвијетиќанин. Таа неодамна за „Кликс“ ги демантираше тие шпекулации, објаснувајќи дека јавноста погрешно ги протолкувала информациите.
„Го нарекоа мој дечко, а всушност тој го напиша сценариото и го режираше спотот. Сето тоа падна во сенка поради таквите наслови“, изјави пејачката.
