Владо Јаневски во една прилика откри како настанала песната „Откако си негова“, која ѝ ја посветил на неговата голема љубов.
– „Откако си негова“ ја напишав за пет минути, по излегувањето со мојата тогашна девојка на Треска. Отидовме на Матка, на еден излет, пред дваесетина години со… со мојата тогашна девојка. И толку еден убав ден поминавме на Матка. И кога се вратив, ми дојде текстот од „Откако си негова“. „Седни кај нашата река и замижи“. Тоа е реката Треска… Треска, кај Матка“, рече тој во емисијата „Еден на еден“ во 2023 година.
-И знам, се сеќавам дека од сите текстови што сум ги напишал во животот, имало подобри, помалку добри, ама ова е еден од добрите кој ми излегол како некој да ми диктирал одозгора. Го чувам ливчето на кое сум ја пишувал, во него нема ни една чкртаница. Значи, како што излегло, тоа ми е единствен текст каде што ни едно зборче не сум сакал да променам. Тоа не се случува никогаш“, рече Владо Јаневски во емисијата.
Наспроти леснотијата со која ја создал „Откако си негова“, Владо раскажа дека хитот „Дома си е дома“ го пишувал три години.
-„Дома си е дома“ е пишувана три години. Зборче ваму, зборче таму… Првата строфа е на аеродром во Москва, каде што го пропуштив авионот за Македонија. И толку ми беше мака. Веќе се видов во Скопје, кај мајка ми дома, гушнат после две години, и јас го пропуштам авионот. И јас од мака што веќе во Скопје бев отиден со главата, седнав и се сеќавам дека напишав строфа. Ама една строфа. После тоа, бев во друга земја, на некоја железничка станица, ми излезе втората строфа. И така се влечеше „Дома си е дома“ три години, три строфи“, рече чаирскиот романтичар.
