Во Скопје утревечер во 20 часот на платото пред арената „Борис Трајковски“, обожавателите на Владо Јаневски ќе имаат можност да се простат од еден од најпознатите македонски пејачи, чии песни со децении беа дел од секојдневието на повеќе генерации.
Според повикот што кружи на социјалните мрежи, присутните ќе можат да запалат свеќи и да ги испеат неговите најголеми хитови, како знак на почит и благодарност за неговиот придонес за македонската музика.
Од продукцијата „Прагма“ која стои зад иницијативата, порачаа дека целта е достоинствено и заедничко збогување, исполнето со емоции, тишина и музика.
„Неговите песни нека одекнат уште еднаш, а светлината од свеќите нека биде симбол на благодарност. Со нашето присуство да покажеме дека вистинските уметници остануваат засекогаш“, стои во објавата на продукцијата „Прагма“.
Организаторите упатуваат повик до сите кои ја сакаа неговата музика да се приклучат на собирот и да му оддадат последна почит на начин кој, како што велат, најмногу му доликува – со песна.
Да потсетиме, Владо Јаневски почина синоќа на 65-годишна возраст, по кратко боледување, на една од скопските клиники.
