Ајсан Есад е правничка, поетеса во душа, а слободен уметник во кујна. Има причично многу пасии. Хедонистка е и љубителка на животот и готвењето. Инаку, членка е на супер-инспиративната Интернет група „Здрава храна мк верзија“.
Овојпат оваа вредна жена нè учи како да направиме совршени домашни јуфки.
Постапка:
14 јајца по можност домашни, 4 чаши млеко се миксираат со рачен миксер.
Во една поголема тепсија се става брашно, се прави дупка во средина, се додава сол и бавно се излева мешавината од јајца и млеко.
Тестото треба да биде повеќе „на тврдо“. Убаво треба да се измеси. За полесно месење се дели на 3- 4 дела. Убаво измесеното тесто се дели на 14 топченца. Се ставаат на малку подмачкана тепсија со масло и покриени со мокра крпа малку да одморат, околу 15 минути. Потое секое се сука во дијаметар околу 40- 50 см. Се оставаат малку да се подзасушат, не треба да бидат суви ниту сосема мокри.
Потоа се преклопуваат во правоаголна лента и се сечат колку е можно потенко околу половина сантиметри.
Исечените јуфки веднаш, со благи движења на двете раце, се протресуваат за да не се лепат. Ова е многу важно за да не се засушат залепени.
Потоа, во мало количество се прават кругченца и се оставаат да се засушат.
Готовите јуфки се чуваат во платнени торби со внимавање да не бидат притиснати бидејќи се лесно кршливи.
