16 октомври е тажен ден за Македонија. Во 2007 година го загубивме Тоше Проески, во 2025 година беше погребот на Владимир Блажев-Панчо од „ДНК“, а на 16 октомври си замина уште еден важен човек.
Станува збор за актерот Марин Бабиќ, кој овој свет го напушти токму на 16 октомври, во 2022 година.
Бабиќ почина по кратко и тешко боледување, на 74-годишна возраст. Тој целиот свој работен век од 1971 година го помина во Драмскиот театар во Скопје.
Ќе остане запаметен по бројните и значајни улоги не само во својата матична куќа, туку и во други театри и проекти и како идеен творец на шоуто „Глумците пеат“.
– Многупати се потврдило дека најгласните заминуваат тивко. Навистина сме благодарни што неговото заминување не беше физички болно за него, едноставно за само неколку денови тој се „одјави“.
Беше мирен и спокоен, слушаше добра музика, имаше одлична нега од персоналот во болницата, ние бевме покрај него. До последно разговаравме за неговите идни планови, сакаше да направи уште еден поетски концерт – рекоа неговите ќерки Маја и Ира за „Слободен печат“ во 2023 година.
Тие во 2023 година ги вратија „Глумците пеат“ на сцената, како аманет од татко им.
