Ѕвездата на „Летечкиот циркус Монти Пајтон“, легендарниот Тери Џонс, почина на 77 години, соопшти неговот агент за медиумите.
На комичарот на легендарната британска трупа во 2016 година му беше дијагностициран потежок облик на деменција, која влијаеше на неговата способност за комуницирање, поради што повеќе не беше способен да дава интервјуа.
Џонс беше еден од основачите на хумористичната група „Монти Пајтон“, која засекогаш го промени светот на комедијата кога дебитираше на Би-Би-Си во 1969 година.
Роден во 1942 во Колвин Беј, Велс, Џонс студирал англиска книжевност кога го запознал Мајкл Пејлин, со кого потоа почнал да пишува сценарија и да настапува во низа ТВ-серии.
Заедно со Џон Клиз, Грем Чепмен, Ерик Ајдл и Тери Гилијам, тие во 1969 ја формираа групата „Монти Пајтон“, чиј „Летечки циркус“ се емитуваше до 1974 година.
Продолжувајќи ја соработката со членовите на групата, Џонс потоа ги режираше филмовите „Монти Пајтон и Светиот грал“, „Житието на Брајан“ и „Смислата на животот“.
Освен во светот на филмот, Џонс се проба и во книжевноста, па исто така беше автор на книга за средновековната историја и бројниот систем низ историја.
