Филмовите во кои глуми холивудскиот актер Џони Деп нема повеќе да се прикажуваат на стриминг платформата Нетфликс во Америка и Австралија.
Имено „Нетфликс Америка“ и „Нетфликс Австралија“ се одлучија да ги избришат од својот каталог сите филмови во кои оваа холивудска ѕвезда има своја улога.
Причината за таквата одлука наводно е судењето кое се одвиваше оваа година меѓу Џони Деп и неговата поранешната сопруга Амбер Хард и таблоидот „The Sun“.
Да се потсетиме, Џони Деп го тужеше британскиот таблоид „The Sun“ и неговиот извршен уредник Ден Вутон поради клевета во статија од 2018 година во која тој е наречен „човекот кој ја тепа својата жена“, а со случајот се занимаваше Високиот суд во Лондон кој потврди дека Џони Деп бил насилникот во семејството.
Деп ја изгуби оваа правна битка вредна два милиони долари. По овој пораз, следеше уште еден во кој тој остана без улогата во „Фантастични ѕверки“.
Актерот на својот Инстаграм профил објасни дека студиото Ворнер Брос го замолило да се откаже од улогата на Гелерт Гриндевалд од спин-оф франшизата „Хари Потер“.
„Го уважив нивното барање и се согласив со тоа барање“, напиша Деп, пренесува Ројтерс.
Недолго потоа, Ворнер Брос соопшти дека улогата ќе му биде доделена на друг актер.
