Поранешната прва дама на Америка, Мишел Обама во интервјуто за „ETonline“ откри како изгледало растењето на нејзините две ќерки во Белата куќа. Таа изјави дека се обидувала да им обезбеди нормално детство, иако тоа било многу тешко.
Барак и Мишел Обама имаат две ќерки, 21-годишната Малиа и 18-годишната Саша. Имено, Мишел изјави дека пресвртот во нивната приватност се случил во една секунда.
„Бевме нормални луѓе се додека Барак не одржа говор на една конференција и тогаш се тргна како ракета“, кажа таа додавајки:
„Осум години живеевме како: Да, вашиот татко е претседател. Тоа нема никаква врска со вас. Одете во училиште. Да, имате заштита со себе, но игнорирајте ги. Вашата цел е да дојдете до училиштето, да се вратите, да имате солидни оценки. Да не се однесувате недолично и да не не срамите“.
Сепак, детството на нивните девојчиња било поинакво од она на нивните врсници.
„Тие постојано покрај себе имаа заштита. Замислите да се обидете прв пат да се бакнете додека околу вас стојат мажи со пиштоли и слушалки во ушите. Замислете ја ситуацијата кога Малиа и Саша одеа кај своите пријателки, а повикот до нивните родители би гласел вака: „Ок, ќе ни треба вашиот број од осигурувањето и датум на раѓање. Ќе дојдат и неколку мажи да ја пребараат куќата. Доколку имате оружје или дрога, слободно кажете им каде стојат бидејќи тие и така ќе ги пронајдат. Нема ништо да земат, само треба да знаат каде стојат. И да, еден маж со пиштол цела ноќ ќе седи на вашиот куќен праг. Дајте му да го користи тоалетот, би било убаво од вас“. Знаете, изненадена сум што моите девојки воопшто имаат пријатели“, откри Мишел.
