По тежок животен период и повлекување од јавноста, српската пејачка Мина Костиќ најави враќање на музичката сцена. Во првото заедничко интервју со својот партнер Каспер (Мане Ќурувија), таа откри дека се чувствува подобро од кога било и дека веќе работи на нов музички проект.
Костиќ изјави дека во моментов ги подготвува новите песни, чиј автор е Каспер, и дека публиката наскоро ќе слушне комбинација од балади и побрзи нумери.
„Одлично сум, никогаш не сум била подобро. Подготвувам нови песни што Каспер ги направи за мене. Ќе има и балади и побрзи песни. Верувам дека публиката ќе биде задоволна“, рече пејачката.
Каспер откри дека веќе завршиле тринаесет песни и дека целосно се посветени на новиот албум.
„Работиме на нови песни. Завршивме дури тринаесет нови нумери што ги напишав за Мина. Верувам дека секоја жена ќе се пронајде во тие текстови“, изјави тој.
Пејачката се осврна и на написите што во изминатиот период се појавуваа за нејзиниот приватен живот, нагласувајќи дека голем дел од нив биле невистинити.
„Сè што излегуваше и што прочитав беше куп глупости. Посебно ме погодија грдите приказни за Каспер. Тоа беше недозволиво“, изјави Костиќ.
Таа истакна дека токму партнерот бил нејзиниот најголем ослонец во најтешките моменти.
„Каспер е навистина најпрекрасниот човек и секогаш е покрај мене. Ме видел и во најубавите и во најтешките моменти. Кога ќе ги слушнете новите песни, ќе ви биде јасно колку сето тоа е вистина“, рече пејачката.
И Каспер порача дека најважно му е Мина секогаш да ја чувствува неговата поддршка, без разлика каде се наоѓа.
„Секогаш сум тука. И кога не сум физички покрај Мина, јас сум со неа. Најважно е таа да знае дека во мене секогаш ја има најголемата поддршка“, изјави тој.
