Музичкиот продуцент и композитор Дарко Димитров има голема причина за среќа и гордост која ја сподели на социјалните мрежи.
Тој забележа нов успех во својата богата кариера. Димитров, чиј музички потпис стои зад бројни хитови на домашната естрада, сподели фотографија на која позира со медал доделен од престижната француска организација САКЕМ, здружение на автори, композитори и музички издавачи.
Ова е една од најстарите и најзначајните организации за заштита на авторските права во светот со седиште во Франција. Таа е светски реномирана институција која ги застапува интересите на авторите, композиторите и издавачите на музика, а доделувањето на признание од нивна страна е сериозна потврда за квалитетот и професионалниот ангажман на еден музички уметник на глобално ниво.
Димитров, кој е долгогодишен соработник со многу наши музички ѕвезди, преку ова признание уште еднаш докажа дека неговиот професионален ангажман ги надминува границите на регионот. Иако тој не прецизираше каде точно е одржана церемонијата, објавата предизвика голем интерес кај неговите фанови и колеги, кои го поздравија овој значаен успех за македонската музичка продукција. Тој сподели слика со песната „Горда“ од Тамара Тодевска како музичка позадина, и ѝ се заблагодари на организацијата за признанието, а сподели и видео од моментот на примањето на наградата.
Димитров неодамна сподели емотивна приказна за својот татко, легендарниот музичар Славе Димитров кој го прослави својот 80-ти роденден. Овој голем животен јубилеј легендарниот музичар го одбележа во прекрасен амбиент покрај море, опкружен со најблиските.
Неговиот син Дарко, преку својот инстаграм-профил сподели емотивни моменти од семејната прослава.
На фотографиите се гледа славеничка атмосфера на отворено, каде што Славе Димитров, со препознатливата насмевка, позира пред роденденската торта. За оваа објава Дарко ја одбра безвременската песна „Каде песно моја“ од 1977 година.
Дарко Димитров упати и јавна честитка до својот татко, објавувајќи заедничка фотографија до која напиша: „Најдобриот татко, среќен роденден“.
