Пејачката и текстописец Леонтина Вукомановиќ ретко зборува за својот приватен живот и никогаш не била дел од јавни естрадни пресметки. Сепак, една од најголемите приказни што со години ја следеа нејзината кариера беа гласините за наводна романса со пејачот Жељко Јоксимовиќ.
По две децении молк, Леонтина реши отворено да проговори за нивниот однос, за периодот кога биле неразделни соработници, но и за конфликтот поради кој со години не разговарале.
„Жељко го запознав во 1999 година за време на турнеја во Република Српска. Потоа поминувавме многу време заедно во студио, работејќи на песни. Во тоа време бев на врвот на кариерата и медиумите често ме поврзуваа со различни мажи, па и со него. Нашата врска никогаш не беше потврдена, тоа беа медиумски шпекулации. Навистина бевме блиски пријатели и соработници“, открила Леонтина.
Таа вели дека двајцата максимално се поддржувале на професионален план.
„Тој пишуваше песни за мојот албум, јас за неговите. Поминувавме денови и ноќи во студио и заедно создадовме многу песни и за други изведувачи“, раскажала пејачката.
Но, нивното пријателство завршило во 2004 година по жестока расправија.
„На Радискиот фестивал настапив со песната „Крила“ и тогаш целосно го сменив тимот на соработници, па меѓу нив не беше ниту Жељко. Тоа воопшто не му се допадна. Имавме страшна кавга на едно снимање, по што целосно ја прекинавме комуникацијата“, признала Леонтина.
Таа открила дека тоа не било единственото несогласување меѓу нив. Во еден период сакала да отвори детски центар, бидејќи со години пишувала песни за деца и настапувала на детски концерти.
„Му ја предложив идејата на Жељко, но брзо се откажав бидејќи тој се гледаше себеси како директор на тој центар“, рекла таа.
Интересно е што по повеќе од осум години молк, помирувањето меѓу нив го иницирала неговата сопруга, новинарката и водителка Jovana Joksimović.
„Иако не разговарав со Жељко, бев во добри односи со Јована. Често гостував во нејзините емисии, а се среќававме и кај заедничката фризерка. Во 2013 година таа ми предложи да направам песна за него. Се согласив, но комунициравме исклучиво преку електронска пошта“, раскажала Леонтина.
Така настанале песните „Лудак као ја“ и „Дама“, кои подоцна ги сними Жељко.
Иако никогаш не го обновиле старото пријателство, двајцата денес имаат коректна професионална комуникација. Леонтина открива дека неодамна повторно соработувале кога на Жељко му бил потребен детски вокал за филмот Toma.
„Неодамна се видовме и на неговата телевизија. Се договоривме да ми компонира песна за Детска Белградска пролет. Сè уште чекам да го направи тоа, бидејќи ми остана должен“, изјавила Леонтина низ смеа.
Иако некогаш биле едни од најблиските музички соработници на српската естрада, нивната приказна покажува дека времето може да ги залечи и најголемите несогласувања.
