По одморот во Египет, македонската музичарка Сара Мејс повторно ѝ се врати на сцената и му се приклучи на караванот „Силно светнал ден“, кој патува низ Македонија по повод 35-годишнината од независноста на земјата.
Овојпат музичко-сценскиот спектакл пристигна во Крушево, каде што на платото Гумење се споија музиката, глумата и танцот. По Охрид, Битола и Велес, градот под Бушева Планина беше следната станица на караванот.
Меѓу учесниците беше и Сара Мејс, која за настапот избра впечатлив розов фустан со бели и розови пердуви. Креацијата е дело на „Ателје бај Соња Марија“, а за нејзиниот изглед се погрижија и Александра Илиеска и Симона Златеска.
Пред настапот, Мејс направи неколку фотографии во зеленилото на Крушево, каде што интензивната розова нијанса на фустанот дополнително дојде до израз.
По вечерта исполнета со музика, таа сподели фотографии на социјалните мрежи и им се заблагодари на домаќините за пречекот.
„Благодарам Ана и цела нејзина екипа за неверојатното гостопримство“, напиша Мејс, додавајќи: „Крушевчани, ве љубам“.
„Силно светнал ден“ е дел од одбележувањето на 35 години од независноста на Македонија, а караванот продолжува со настапи и во други македонски градови.
