Свеченото доделување на филмските награди Златен глобус ќе се одржи на 28 февруари 2021 година, а не во јануари како што досега беше вообичаено, објавија организаторите.
Наградите Златен глобус ќе се доделуваат во викендот кој беше предвиден за доделувањето на Оскарите, а свеченоста на нивното доделување е поместена на 25 април.
Наградата Златен глобус ја врачува Асоцијацијата на новинари од странство, акредитирани во Холивуд. Се доделува еднаш годишно и според престижот е на второ место, по Оскарот.
Ритамот на холивудскта филмска индустрија целосно е пореметен поради пандемијата на коронавирусот, кој ги испразни киносалите во изминатите три месеци.
Организаторите за доделувањето на Оскарите исто така се сложија да го продолжат периодот на квалификации – од 31 декември оваа година до крајот на февруари 2021 година.
Доделувањето на наградите БАФТА, Британската академија за филмска и телевизиска уметност, исто така е одложено за 11 април.
Поради пандемијата, снимањето и пост-продукцијата на многу филмови кои требаше да бидат прикажани до крајот на годината, се одложени до неопределено време.
Доделувањето на Оскарите досега било одложувано само три пати – поради поплавата во Лос Анџелес 1938 година, поради убиството на Мартин Лутер Кинг во 1968 година и обидот за убиство на претседателот Роналд Реган во 1981 година.
Не е познато дали доделувањето на престижните филмски награди ќе биде одржано онлајн или во живо.
