Холивудскиот актер Џорџ Клуни прозборе за периодот на карантини предизвикани од коронавирусот. Тој поголемиот дел од времето го поминувал со неговата 42-годишна сопруга Амал и нивните тригодишни близнаци Александер и Ела.
Оваа година во мај, Џорџ Клуни ќе наполни 60 години, па се подразбира дека за него секако било навистина голем предизвик поголемиот дел од времето да биде затворен дома со тригодишните близнаци кои имаат енергија да поместат планина.
Тој за „Лос Анџелес Тајмс“ откри како му поминале последните девет месеци.
„Последните девет месеци ги поминав претежно дома. Имам тригодишни близнаци, па навистина беше голема авантура која вклучуваше миење садови и менување пелени. Најчесто моја“, рече Клуни.
Како што вели актерот, тој е свесен дека има голема среќа што ја имал таа привилегија да бира каде ќе го помине тоа време – во вилата од 10 милиони американски долари во Англија, онаа во Лос Анџелес или неговата омилена резиденција на езерото Комо во Италија.
„Добро е што имаме доволно простор во куќата, а по потреба можеме да уживаме и на воздух“, изјави актерот.
Тој вели дека е убеден дека сите ќе излеземе како подобри луѓе по оваа тешка година.
„Ова беше страшна година за сите нас. Почна лошо и продолжи така до сега… Но, јас сум еден од среќниците затоа што сè уште имам успешна кариера...“, вели тој.
„Грижејќи се за вашето семејство, истовремено се грижите за целата земја… Ова беше навистина ужасна година, но ќе помине. Убеден сум во тоа“, истакна Клуни.
Преземено од Слободен Печат.
