Со желба да ѝ даде нова енергија на македонската народна музика, Адријана Петрушовска го промовираше својот нов мини-албум „Ој девојче, девојче“.
Проектот содржи современи преработки на добро познати македонски народни песни, споени со модерни аранжмани и освежен музички израз.
„Сакав преку овие песни повторно да нè потсетам на нашите корени и на богатото музичко наследство што го имаме. Македонската народна музика носи огромна вредност и заслужува да продолжи да живее и кај новите генерации“, истакна Адријана.
За време на промоцијата, пејачката во живо и со многу емоции ги испеа опесните од албумот, а атмосферата продолжи во одлично расположение и музичка дружба.
На мини-албумот се наоѓаат „Твојте очи, Лено“, „Јовано Јованке“, „Дејгиди луди млади години“, „Море сокол пие“, „Со маки сум се родила“ како и насловната „Ој девојче, девојче“.
Аранжманите за сите песни ги потпишува Јован Василевски.
Првиот видеоспот е снимен токму за носечката песна „Ој девојче, девојче“, а како што откри Адријана, кадрите се снимани во нејзиното родно Драчево.
