На светскиот ден на кучињата, ви откриваме една мала тајна. Вашите кучиња не ве разбираат во целост кога им зборувате.
И покрај „човечките“ аудитивни способности за толкување на звуците на говорот, кучињата не ги слушаат суптилните разлики помеѓу зборовите како луѓето.
Истражувачите од Универзитетот „Eötvös Loránd“ во Будимпешта ја мереле мозочната активност на кучињата користејќи техника наречена електроенцефалографија, која вклучува лепење електроди на глави на животни.
Експертите откриле дека кучињата, кои не се специјално обучени за експериментот, можат брзо и јасно да ги разликуваат познатите зборови со инструкции и многу различни бесмислени зборови, пишува „Си-Ен-Ен“.
„Активноста на мозокот е различна кога слушаат упатства што ги знаат и кога слушаат различни бесмислени зборови, што значи дека кучињата ги препознаваат тие зборови“, вели водечката авторка на студијата, Лила Маѓари.
Кучињата имале електроди прикачени на главата и им пуштале серија зборови додека се мерела нивната мозочна активност.
Сепак, животните не обрнувале внимание на малите разлики помеѓу познатите зборови и бесмислените зборови со сличен звук. Наместо тоа, кучињата ги третирале како ист збор, вели Маѓари.
Кучињата се познати по своите слушни способности. Тие можат добро да ги слушаат зборовите и звуците и да ги разликуваат звуците од говорот.
„Сепак, изгледа дека навистина не обрнуваат внимание на сите звуци на говорот“, рече таа, додавајќи дека понатамошните истражувања можат да објаснат зошто.
Студијата исто така потврдила дека кучињата всушност го слушаат човечкиот говор и не реагираат само на познати луѓе или говор на телото.
„Тоа навистина покажува дека кучињата можат да ги разликуваат зборовите што ги знаат од бесмислени зборови“, рече таа.
