Има 54 години, сопруга, мајка на два сина, 28 и 20 години, професорка во средно училиште и изгледа токму вака. Најмалку дваесет години помладо. Се прашувате како? Ќе ви открие токму таа – Татјана Алексиќ.
Додека сите мака мачат како да ги симнат килограмите, таа е на режим за дебелеење. Ама нема чистачка дома, таа сама, како што знае да се пошегува, со најразлични перформанси и сценски настапи, го одржува домот. Не вози автомобил веќе десет години, се движи и трча по автобуси, вели Татјана Алексиќ.
– Во континуитет, од најраната младост ја негувам кожата на лицето и на телото. За мене, тоа е основна хигиенска навика, секојдневен ритуал пренесен од мајка ми, бабите, стрина ми… Кога растеш покрај негувани жени, не можеш поинаку. Два-три пати годишно одам на темелно чистење на лицето во комбинација со кристален пилинг кај д-р Петрушевска, а кога имам можност и на класично чистење на лицето со масажа, кај мојата маалска козметичарка Мими. Во последно време стекнав апсолутна доверба во кремите на германскиот бренд „Логона“, исклучителна козметика со долга традиција и широка палета на природни производи. Најмногу ми годи серумот и антиејџ-програмата, која гарантира видливо подмладување на кожата. Практикувам туширање, користам пилинг-ракавица. Сакам да наполнам када со морска сол и маслиново масло и добро да се истријам од глава до петици. После секое туширање – масло од лаванда, а во лето млеко за тело со дискретен шајмер кој ѝ дава вештачка свежина на кожата.
Омилена активност ѝ е чистењето по дома, но на тоа ги додава трчањето по автобуси и движењето, бидејќи десет години не вози автомобил, и драмските проби во училиште.
– Многу се движам, веќе десет години не возам автомобил, што значи трчам по автобуси и одам пешки. Со учениците од „Корчагин“ секоја сабота имаме драмски проби со кореографии и физичка активност, што на овие години е сериозен тренинг. Три месеци вежбав во студиото на одличен фитнес-тренер, Тања Блажевска, сега паузирам, па, напролет, повторно. Секојдневна и омилена физичка активност ми е чистењето по дома – кој чисти добро знае како се топат калории кога бришеш прозори, па имаш сценски настап со правосмукалка и џогер, склекови додека собираш прашина под кревет, истегнување со лов на пајажина по плафонот и слични перформанси.
Од септември е на режим за дебелеење, јаде дење-ноќе што ќе стаса и се „залива“ со 1.500 калории во шише. Стасала до 60 килограми, на 175 висина, и како што вели, заличела на нахрането суштество. Решила да дојде до идеалните за неа 65 килограми и ќе продолжи со консумирање додатни калории – единствено решение за додавање килажа. Се надева дека и климаксот природно ќе ѝ додаде некое килце.
