Дури 92 отсто од луѓето се свесни дека изложеноста на сонце е ризичен фактор, но само 18 отсто од нив редовно користат заштита од УВ-зрачењето, беше истакнато во вторникот по повод годинешната кампања за јавно здравје „Евромеланома 2020“, посветена на борбата против ракот на кожата.
Инциденцата на карцином на кожата, особено на меланомот како најопасна форма на рак на кожата, е во постојан пораст, па експертите секоја година пред летното излегување на сонце, укажуваат на потребата од заштита од штетното УВ-зрачење, потребата од редовни самопрегледи и јавување кај дерматолозите доколку се забележат промени на кожата.
Еднаш месечно самопреглед на кожата
Податоците покажуваат дека само 33 отсто од граѓаните прават самопрегледи на кожата еднаш годишно, а дерматолозите сметаат дека тоа треба да се прави еднаш месечно.
Меланомот е на осмо место кај мажите, а на деветто место кај жените според зачестеност меѓу малигните заболувања, со тоа што е почест кај жените во возрасна група до 45 години.
Меланомот е еден од најсмртоносните малигни тумори на кожата. Може да метастазира многу брзо ако не се открие навреме. Дерматолозите се загрижени поради фактот што многу луѓе доаѓаат на преглед доцна, со веќе напреден меланом.
Сѐ повеќе помлади жени користат солариуми
Дерматовенеролозите од година в година бележат сè повеќе помлади жени во ординациите.
– Гледаме дека во текот на целата година ни доаѓаат во ординациите атрактивни потемнети жени, што е знак дека голем број млади луѓе континуирано користат солариуми, што претставува трипати поголем ризик за настанување тумор на кожата отколку природните услови на сонцето – велат дерматолозите.
Во текот на летото изложеноста на сонце е вообичаена, но треба да се изложувате мудро – со избирање на периодот од денот кога ќе бидете на сонце и со користење заштитни фактори, односно кремови за сончање.
Секоја промена на бенката
Ако забележите бенка што почнала да се менува со текот на времето, станала потемна или поцрвена, почнала да крвави, да чеша или се формирале некои красти, треба веднаш да се јавите на лекар.
