Секој има своја цена. Важно е само да знаете колкава е таа, рече одамна починатиот злогласен нарко бос Пабло Ескобар, а за неговиот дом денеска да се претвори во луксузен хотел потрошени се дури 17,5 милиони долари.
Туристичкиот комплекс е направен на имотот на познатиот мафијаш, а се наоѓа на плажа во Тулум, Мексико.
Оваа локација се смета за најпопуларна туристичка дестинација на полуостровот Јукатан.
Всушност, купен е само еден дел од некогашната вила на Пабло Ескобар, познатата Каса Малка и тоа за 17,5 милиони долари, додека за нејзино уредување се одделени дополнителни 100 милиони.
Луксузниот комплекс има „само 42“ единици за сместување, кои се пространи и совршено уредени. Хотелот, иако се наоѓа на плажа, има и два базени.
Во комплексот се наоѓаат и два ресторани и низа на продавници од познати марки, пишува „Сео Лајфстајл“.
Иако многумина не се согласуваат дека поврзаноста на овој објект со бруталниот Ескобар е добра за бизнисот, сепак токму тоа придонесе многу познати лица да се заинтересираат за Тулум, а со самото тоа и многу туристи добија желба да го посетат ова место.
Читателите на туристичкиот магазин „Конте нас травелер“ го прогласија овој комплекс за еден од најдобрите во 2020 година.
