За да ги избегне секојдневните работни обврски, оставајќи впечаток дека е многу зафатен, шведски даночен советник си се јавувал од неговиот службен телефон на неговиот приватен мобилен телефон 55 часа, додека неговите претпоставени не го открија.
„Наместо да прима телефонски повици, Андреас се јавувал на својот мобилен телефон, што резултираше со сигнал „зафатен“ во системот, така што дојдовните повици ги преземаше некој друг“, стои во дисциплинскиот извештај на шведската даночна администрација, добиен од АФП.
28-годишниот Швеѓанец, кому сега му се заканува отказ, од март до мај си се јавил самиот на себе дури 32 пати и „разговарал“ цели 55 часа, што е седум дена ефективна работа за два месеци, се наведува во извештајот на даночната управа.
Некои од овие повици понекогаш траеле со часови. Андреас бил вработен во даночната администрација од мај 2020 година, но поради пандемијата, работел од дома од јануари 2021 година.
Меѓутоа, во април, еден од неговите претпоставени забележал дека телефонирал невообичаено долго време во споредба со просечните потреби за работа.
Кога бил повикан на разговор со претпоставените, тој признал што направил, иако интерната истрага покажала дека истото го повторил уште четири пати по споменатиот разговор и кога шефовите го повикале на разговор во мај, тој одговорил дека неговата мотивација за работа била „екстремно ниско“.
