Денес сме во прекрасната цветна оаза на Драгица Костоска во најубавото Брусанско маало во Кавадарци.
Оваа госпоѓа ни раскажува дека за дворот што се простира на 55 м2 се грижи сама, има многу видови цвеќе од крин, до гладиоли, медарче, зарче, винки… па кактуси кои ги обожава затоа што не мрзнат па се до декоративни треви, палми, хризантеми и суколенти.
„Многу ја сакам пампас тревата, лесна е за одгледување има брз раст, не мрзне и секогаш привлекува погледи“, ни вели госпоѓа Костоска.
Во постудените месеци голем број од цвеќињата и растенијата ги чува во домот, а останатите како што вели, си имаат статично место на кое не мрзнат и опстануваат и на минусни температури.
„Времето за мене во градината почнува со утринско кафе, уживам во убавината на овие живи растенија, најмалку два до три часа во денот поминувам во мојот двор“, ни вели таа.
А кога ја прашавме за да сподели барем еден градинарски совет со оние кои сакаат да почнат со одгледување на цвеќиња, еве што каква мудрост сподели со нас.
„За да се одгледува цвеќе треба да се сака и да имаш услови, желба, тоа нешто да ти ја исполнува душата. Цвеќињата возвраќаат многу повеќе од тоа што го очекуваш“, вели нашата Драгица.
