Американскиот претприемач и сопственик на Твитер, Илон Маск, најави дека ќе ги врати блокираните сметки на социјалната мрежа откако мнозинството учесници во неговата анкетасе изјасниле за „амнестија“ на забранетите профили.
„Народот си кажа. Амнестијата ќе започне следната недела. Vox Populi, Vox Dei (гласот на народот е гласот на Бога)“, напиша тој.
Денес беше објавено и дека Твитер затвори една од европските канцеларии на социјалната мрежа, лоцирана во Брисел.
Највисокото раководство на белгиската канцеларија ја напуштило компанијата на почетокот на ноември за време на големите кратења. Други вработени ја напуштиле социјалната мрежа минатата недела, вклучително и шефовите на дигиталната политика за Твитер во Европа, Јулија Мозер и Дарио Ла Наса.
Токму отпуштените работници биле одговорни за почитување на правилата на ЕУ за дезинформации на социјалната мрежа. Во овој поглед, ЕУ стравува дека сега компанијата можеби нема доволно вработени за да ги почитува локалните закони за контрола и филтрирање на онлајн содржините.
