Заедничко истражување спроведено од медицинските факултети во Атина и во Харвард покажало дека проценетата опасност од смртни исходи од срцевите заболувања е дури 34 отсто помала кај луѓето што спијат попладне.
Овој одмор е особено ефикасен за вработените мажи, особено за пилотите на долгите комерцијални линии. Научниците утврдиле дека само еден час одмор во текот на летот, ја зголемува будноста на пилотот, концентрацијата и вниманието во наредните 10 часа.
Ако дремат само 26 минути, додека копилотот управува со авионот, општата претпазливост и будност се зголемува за 54 отсто, а професионалната способност за 34 отсто.
Исто така, утврдено е дека попладневните спијачи помалку страдаат од несоница ноќе, а дека нивниот сон во континуитет е подолг за 20 минути. Дека попладневното дремење е многу важно за телото и мозокот, потврдуваат и многубројни светски умови, меѓу кои и Алберт Ајнштајн, кој редовно дремел во својата фотелја со молив в рака.
Тој се будел кога моливот ќе паднел и ќе удрел на подот. На тој начин се спречувал себеси да западне во длабок сон, по кој неговите мисли не би биле целосно бистри.
Попладневната дремка штити од срцев удар
