Во долгата борба против ковид-19, лекарите и медицинските сестри наскоро може да имаат нова, скромна алатка во нивниот медицински арсенал – алги. Иако алгите се користат во медицински цели со векови во различни делови на светот, се чини дека во последните децении морските алги речиси и не се употребуваат. Но, тоа наскоро може да се промени.
„Во минатото, луѓето на британските острови ги разбираа лековитите својства на алгите – чајот од алги потекнува од нашите предци кои го користеле за закрепнување од грип и настинка. Но, се чини заборавивме на тоа. До сега“, вели Фиона Хјустон, основач на „Mara Seaweed“ од Единбург во разговор со „Хералд“.
Истражувачите откриле дека најчесто користениот разредувач на крв, хепарин е најефикасен во неутрализирање на вирусот „SARS-CoV-2“. По влегувањето во телото, шилестите протеини на површината на вирусот се лепат на рецепторите на човечките клетки, а потоа го напаѓаат организмот.
Хепаринот е хемиски и структурно сличен на нормалните клеточни рецептори, служи како ефикасна „мамка“, предизвикувајќи вирусот да се придвижи кон него, со што или ја спречува инфекцијата или ја намалува нејзината сериозност.
Кога истражувачите започнале да бараат други, структурно слични супстанции кои би можеле да послужат за слична намена како „мамка“ за вирусот, одредени алги биле најсоодветниот природен избор.
Во лабораториските истражувања, екстрактот од морска алга наречен „RPI-27“ го надминал вообичаениот антивирусен ремдесивир за околу 8 пати со инхибиција на вирусна активност.
„Мамката ефикасно ја блокира инфекцијата. Се меша и го повлекува вирусот, и затоа вирусот не може да се поврзе со површината на клетките. Откако ќе стигне до овие соединенија –екстракти од алги или епарин – вирусот веројатно се распаѓа и не е толку ефективен“, вели Џонатан Дордик, водечки истражувач и професор по хемиско и биолошко инженерство на Политехничкиот институт „Ренселер“.
Истражувањето продолжува и се спроведува на 480 медицински работници од првата линија на фротот во Велс, на кои или им бил даден спреј за нос врз основа на карагелоза (алги) или плацебо, пишува „Business News Wales“.
Резултатите се очекува да бидат објавени во март 2021 година.
„Ако резултатите од ова експериментално клиничко испитување се позитивни како што очекуваме, ова има потенцијал да биде дополнителна стратегија за превенција во борбата против ковид-19“, вели д-р Зита Џесоп, главен истражувач на клиничкото испитување.
Преземено од Слободен Печат.
