Нутриционистката Елена Мирческа е со нас за да се „стегнеме“ оваа есен.
Здравиот начин на исхрана е во мода, а добрите нутриционисти се сè побарани. Особено, ако здравиот диетен режим би можеле да го комбинираме со физичка активност. Нутриционистката и фитнес-инструкторка, Елена Мирческа, нѐ советува како да дојдеме во топ форма за време на есента. Зашто, не заборавајте, убавите тела кои ги гледаме секоја пролет и лето, се „вајаат“ токму во есен и во зима.
А, некои веќе успеаа во тоа!
Таков е примерот со прилепчанката
Елизабета Магдеска Петкоска
.
На прашањето зошто се реши на таков чекор првпат после толку години и цел живот со прекумерна тежина, таа одговори: „Од инает, зошто ми рекоа дека после 40та година тешко дека ќе ослабеш! Е па им докажав дека можам“, се смее Елизабета Магдеска Петкоска и продолжува:
„Важна е волјата, истрајноста и упорноста!“
А очигледно Ели имаше доволно волја за од 130 кг да се симне на 89 во моментов, а продолжува и понатаму, се разбира постепено и под надзор од својата менторка. За седум месеци!
На прашањето како успеа, таа вели: „Слушај си ја учителката и држи се до правилата, и онака од ништо не си скратен, јадеш се во доволна количина и гладен не си воопшто. Е сега, нема смоки, нема месено, ни чајна, ама мотивот е голем, кога гледаш како постојано јадеш, а килограмите одат надолу!“
Ели е пример за упорност, покрај програмата за исхрана, таа се приклучи и на фитнес часовите кај Елена, на почетокот во студио, сега онлајн во живо со неа, и после толку месеци таа сѐ уште не пропушта час!
– На почетокот поради килажата, голем дел од вежбите се чинеа невозможни, но Ели никогаш не се откажа, прво ги модифицираше и секој следен час можеше се повеќе и повеќе, за сега без проблем да бира дали да се приклучи во тешка или во лесна група и да одработи се без застанување. Е тоа е упорност!, ни рече фитнес инструкторката Елена Мирческа.
Покрај тоа, Ели почна да се качува и на планини. Ако на почетокот и беше тешко и ѝ требаше многу време да искачи некое мало ритче околу Прилеп, сега за неа предизвик се вистински врвови, меѓу кои и Солунска глава, која е предизвик и за сите искусни планинари, а таа во неполни два месеци ја качи дури два пати!
Ели е вистинска мотивација и инспирација за сите жени кои се соочуваат со прекумерна тежина и се борат со истата со години. Таа им порачува на сите да пробаат и да не се откажуваат кога ќе дојде кризен период, зашто тој поминува, а одразот во огредалото е она што останува!
