Многумина беа изненадени што американскиот актер не присуствуваше на доделувањето на БАФТА наградите во Лондон, со оглед на тоа што беше јасно дека ќе го освои престижното признание за најдобра споредна улога.
Во деновите пред церемонијата на доделувањето на БАФТА наградите, се појавија фотографии од Ројал Алберт Хол, каде традиционално се одржуваат, а на една од столиците стоеја името и фотографијата на Бред Пит. Тој играше во филмот на Тарантино „Беше еднаш во Холивуд“, кој минатата година беше еден од најуспешните. Бред е номиниран за најдобра споредна улога и во текот на целата сезона не пропушти ниту една церемонија.
На настанот БАФТА, наградата за Бред Пит ја подигна неговата колешка Маргот Роби, која го прочита говорот на Пит и се пошегува на сметка на Мегзит.
Како што јавуваат странските медиуми, Пит ги пропушти БАФТА наградите поради приватни причини, а сега е откриено и која е причината – Медокс Џоли Пит (18).
Најстариот син на Анџелина Џоли и Бред Пит студира во Јужна Кореја, на Универзитетот Јонсеи во Сеул, а овие денови се врати во Америка, поради што актерот во последен момент ги откажа сите обврски. Со оглед на тоа што тие двајца имаат лош однос, Пит наводно се труди да го поправи, па БАФТА наградите ги стави во втор план.
„Медокс е на факултет, па кога Бред дозна дека ќе биде дома во периодот кога се наградите, откажа се за да се види со него“, изјавил извор близок на актерот.
Анџелина Џоли го посвои Медокс во 2002 година во периодот кога беше со актерот Били Боб Торнтон, но тој никогаш не му беше татко на детето. Откако Џоли и Торнтон се раздвоија, таа после неколку години стапи во врска со Бред Пит, кој и официјално го посвои Медокс во 2006 година. Кога беше објавено дека Бред и Анџелина се разведуваат, американските медиуми постојано пишуваа за лошиот однос кој актерот го има со најстариот син од 6-те деца со Џоли, а наводно Медокс еднаш имал и физичка пресметка со својот татко. Своевремено медиумите пишувале дека момчето „повеќе никогаш не сака да го види својот татко“ и дека му забранил да присуствува на роденденската забава во 2017 година, но поедини извори тврдат дека Бред и Медокс се обидуваат да го подобрат својот однос.
