Пријателот на Џони Деп, Исак Барух, се расплакал во судот додека зборувал дека наводите за семејно насилство на поранешната сопруга на актерот, Амбер Херд се злонамерни и лажни и дека откако се рашириле низ светот му го уништиле животот.
За време на неговото сведочење, поротата слушнала дека Барух живеел бесплатно во стан во сопственост на Деп помеѓу 2013 и 2016 година, кој се наоѓал веднаш до друг пентхаус во кој живееле актерот и Амбер, пишува Sky News.
Барух дал живописно сведоштво кое повремено предизвикувало смеа кај присутните во судницата, вклучувајќи ги и Деп и Амбер. Но, тој станал емотивен кога го прашале дали е лут на актерката.
– Не сум лут на никого. Ѝ посакувам се најдобро, да преземе одговорност, да оздраве и да продолжи понатаму… За Џони неговото семејство е целосно уништено од сите тие работи и не е … не е фер … не е во ред тоа што таа го направи и што се засегнати толку многу луѓе, не е нормално како се случи тоа – одговорил тој.
Кога го прашале што мисли за Амбер, Барух рекол дека сопругата на неговиот пријател е одлична и дека ја сака.
– Се вљубив во неа исто како Џони. Таа е полна со почит. Се однесуваше кон мене со целосна почит и беше многу забавна. Постојано ми нудеше храна и пиење кога одев кај нив – изјавил тој и додал дека Деп и Херд се сакале од првиот ден, дека никогаш не видел насилство и дека пред него се скарале само два пати.
