Два американски воени брода поминаа низ Тајванскиот теснец, oва е прв пат да се случи од почетокот на воените маневри што Кина ги спроведе во близина на островот, во екот на тензии меѓу САД и Пекинг.
Воената морнарица на Соединетите Американски Држави соопшти дека овој премин „ја демонстрира посветеноста на Соединетите Држави за слободен и отворен индо-пацифички регион“, се вели во соопштението за печат.
Станува збор за ракетните крстосувачи Uss Antietam и Uss Chancellorsville, кои официјално „спроведуваат рутински транзит во теснецот“, објаснува морнарицата во соопштението.
Американските воени бродови, а во некои прилики и бродови на сојузничките земји, како што се Британија и Канада, редовно пловеа низ теснецот во последниве години, предизвикувајќи гнев кај Пекинг. Кина, која тврди дека Тајван е нејзина територија, започна воени вежби во близина на островот по посетата на Пелоси на почетокот на август и оттогаш таквите вежби не престануваат.
