Британскиот телевизиски водител Филип Скофилд преку социјалната мрежа Инстаграм и соопшти на јавноста дека е хомосексуалец.
Водителот на најпопуларната британска емисија, утринската програма „This Morning“, 27 години е во брак со Стефани Лов, со која има и две ќерки.
„Со поддршка од мојата сопруга и моите ќерки го прифатив фактот дека сум хомосексуалец. Тоа предизвика бројни тешки разговори во нашиот дом. Во брак сум со Стефани речиси 27 години и имаме две прекрасни ќерки. Моето семејство ме одржа во живот, се обидуваа да ме развеселат, да ми дадат безусловна љубов и нежност, иако и самите се збунети. Но, и натаму не можам да заспијам и поминав некои навистина мрачни моменти. Конфликтот на она што сум длабоко во себе и надворешниот свет се намали. Денеска, и тоа со право, да се биде геј е причина за слава и гордост. Да, чувствувам голема збунетост, но причината за тоа е само болката која му ја нанесувам на своето семејство“, напиша тој.
„Стефани беше неверојатна, многу ја сакам. Таа е најљубезната душа која сум ја запознал. Моите ќерки ме воодушевија со својата љубов, прегратки и охрабрувачки зборови за утеха. И моето и семејството на Стефани ме запрепастија со својата љубов, прифаќање и поддршка. Секако дека се загрижени за Стефани, но знам дека и на двајцата ќе ни помогнат да се кренеме. Моите пријатели се најдобри, посебно Холи, која беше толку љубезна и мудра. Не можев да се надевам на попрекрасен тим во однос на оној со кого работам на телевизија“, додава водителот во своето соопштение.
Скофилд својата кариера во медиумите ја започна во 1982 година, кога се вработи во радио во Нов Зеланд, а потоа доби работа во „Би-Би-Си“.
Пред 18 години Скофилд почна да води утринска програма, а повеќе од една деценија тој работи со Холи Вилохи.
„Никогаш не сум била погорда на својот пријател од денеска“, напиша таа на Инстаграм набргу по неговото признание.
