Актерката Шанел Маја Бенкс, чие мистериозно исчезнување пред две недели го пријавило нејзиното семејство, денеска е пронајдена и е безбедна. Полицијата трагаше по 36-годишната актерка, позната по улогите во ТВ сериите „Озборувачка“ и „Сина крв“, откако нејзиното семејство пријавило дека се немаат слушнато со неа од 30 октомври, пишуваат странските медиуми.
Нејзината роднина Данијела-Тори Синг, која долетала од Торонто за да помогне во потрагата по неа, откри дека тие две се многу блиски, дека редовно се слушаат и дека семејството останало многу загрижено бидејќи никој не разговарал со неа подолго време.
Сепак, вчера конечно пристигнаа добри вести, откако полицијата во Лос Анџелес објави дека Бенкс е пронајдена и е безбедна.
Полицијата од Лос Анџелес даде официјално соопштение дека ја пронашле Шанел.
„Добра е. Не е во опасност. Во ред е. Повеќе не се води како исчезната личност и ја затворивме истрагата“, изјави вчера (13.11) портпарол на полицијата.
Како што е соопштено, во овој случај немало кривично дело, така што никој не е осомничен или обвинет за нејзиното исчезнување. И како што е објавено, случајот сега се смета за затворен.
Инаку, Бенкс живее со сопругот, а кога било забележано дека со денови не се јавила на никого, полицијата открила дека нејзините работи, вклучувајќи го и автомобилот и кучето, сè уште се на имотот. Сепак, не успеале да ги лоцираат нејзиниот лаптоп и телефон. Нејзината братучетка откри дека дури и залепила флаери во соседството на актерката за да моли за помош, но изјавила и дека сопругот на актерката не покажал подготвеност да помогне.
