Поранешниот филмски продуцент Харви Вајнстин е пренесен во озлогласениот њујоршки затвор „Рајкерс“ вчера, десет дена откако е осуден за силување и сексуален напад.
67-годишниот продуцент од историската пресуда 24 февруари се наоѓаше во болница во Менхетен, откако се пожалил на болки во градите.
Вајнстин, чии филмови освојуваа и Оскари, по операцијата е пренесен во болничката единица во затворот Рикерс, рече за АФП неговиот портпарол.
„Отстранет е проблемот“, рекол тој, а неколку американски медиуми пренесоа дека на Вајнстин му е вграден стент.
Вајнстин беше прогласен за виновен за сексуален напад на поранешната асистентка Мими Халеји од 2006 година, и за силување на поранешната глумица Џесика Ман во 2013 година.
Ослободен е по две точки на обвинението за предаторски сексуален напад, за што можеше да добие и доживотен затвор.
Движењето (#MeToo) „И јас исто така“ против непримерното сексуално однесување на пресудата се осврна како историска, но тимот на Вајнстин вели дека ќе вложи жалба.
Рајкерс е еден од најпознатите американски затвори во кои беа затворени познати личности како Сид Вишс од „Секс пистолс“, раперот Тупак Шакур и поранешнот директор на Меѓународниот монетарен фонд (ММФ) Доминик Штраус-Кан.
Големиот комплекс, познат по редовните насилни испади против затворениците и чуварите, ќе се затвори во 2026 година.
