– До крајот на оваа недела во Македонија продолжува периодот на променливо облачно време со сончеви периоди. Утре ќе има појава на локални слаби врнежи од дожд, додека на повисоките места и на планините ќе провејува снег. Снежната граница локално можно е да се спушти и под 1000 м.н.в. Ќе дува слаб до умерен ветер од северен правец. Наутро температурите ќе се спуштаат во интервалот од – 5 до 2 степени, додека максималните дневни ќе се искачуваат во интервалот од 5 до 12 степени.
Во Скопје и околината исто така времето ќе биде променливо облачно со сончеви периоди и со слаб до умерен ветер од северен правец. Утре ќе има услови за локално проврнување на дожд, додека на околните планини ќе провејува слаб снег. Наутро температурите ќе се спуштат до околу – 1 степен а максималните дневни температури ќе се искачуваат во интервалот помеѓу 8 и 9 степени. Во текот на следната седмица очекуваме НОВА ПРОМЕНА на временската состојба кај нас. Ќе дува ЗАСИЛЕН ветер од јужен и од југозападен правец и ќе има нови повремени врнежи од дожд со променлив интензитет. На планините особено во западните и во северозападните предели ќе има врнежи од снег. Температурите ќе бидат малку повисоки за разлика од сегашните. Детална анализа околу оваа нова промена на времето следува деновиве! – вели метеопрогнозерот Славчо Попоски.
