Синоќа во Сплит починал Владо Правдиќ, клавијатурист на „Бијело Дугме“. Ова за „Аваз“ го потврдил негов близок пријател.
Правдиќ, како што се наведува, починал во пресрет на својот 74-ти роденден, кој бил на 6 декември.
Владо е роден во Сараево, а на шестгодишна возраст почнал да учи да свири пијано. По завршувањето на средното музичко училиште студирал физика. Тој во својата музичка кариера свирел со „Амбасадори“, „Индекси“ и „Бијело Дугме“.
Владо Правдиќ бил во составот на „Индекси“ до 1973 година, кога се префрлил во групата „Јутро“, тогашното име на групата „Бијело дугме“. Правдиќ свирел на првите два албуми на легендарната група.
