Андреја Ѓорѓиески – Андреј од „ДНК“ е еден од загинатите во пожарот што избувна во дикотеката „Пулс“ во Кочани. Познатиот музичар на 43 години трагично го загуби животот, пренесуваат повеќе македонски медиуми.
Како што пренесоа неколку медиуми, Андреј подлегнал на повредите, имал тешки изгореници и се обидувал да им помогне на гостите кога избувнал пожарот.
Цело утро за него се споделуваа апели да се пронајде, дека не се знае каде е, а по информацијата дека наводно е лоциран, за жал осамна веста за неговата смрт.
Дел од македонската естрада и блиските веќе се простуваат од него на социјалните мрежи, меѓу кои Лила, Миа Костова, Тамара Тодевска, Весна Петрушевска…
Андреј Ѓорѓиески заедно со Владимир Блажев – Панчо беше дел од популарното музичко дуо „ДНК“. Заедничката кариера ја започнаа во 2001 година кога го пуштаат првиот сингл на „ДНК“ со наслов „Девојка за везден“ за кој снимаaт и видео запис.
