Легендарниот музичар Ози Озборн по 10 години пауза, конечно ги израдува фановите со нов албум под наслов „Ordinary man“, кој денеска и официјално и е претставен на јавноста.
Новиот албум на Ози вклучува соработки со Елтон Џон, гитаристот Слеш, тапанарот на „Red hot chili peppers“ Чед Смит, раперот Пост Малоун и уште неколку познати музичари.
„Принцот на темнината“, како што го нарекуваат популарниот Ози, го претстави албумот кој неодамна го опиша како „најдобриот досега“, но судејќи уште по нумерите кои го најавуваа албумот, фановите веќе почнаа да си го поставуваат прашањето – дали ова е неговото последно музичко парче?
Во албумот кој содржи 11 нумери се наоѓаат насловите како „Ordinary man“, „Goodbye“, „Today is the end“, „Over the graveyard“ и уште неколку песни, чии текстови се на еден начин ретроспектива на кариерата на Ози, но и негово збогување од фановите.
Целиот албум можете да го преслушате овде.
Пејачот неодамна ја откажа турнејата по Северна Америка на која требаше да го промовира албумот, откако му беше дијагностицирана Паркинсонова болест, па се уште не е познато кога ќе се случи концертната промоција.
