Американската пејачка Пинк (40) открива дека нејзиниот син се чувстува подобро откако му беше дијагностициран коронавирус, а признава дека плачела и се молела по цели ноќи додека двајцата се бореле со болеста.
Пинк во петокот објави дека таа и нејзиниот тригодишен син Џејмисон се позитивни на Ковид-19. Во саботата пејачката на Инстаграм напиша дека и таа и нејзиниот син сега се чувствуваат подобро, но и дека сè уште не се опоравени во целост.
„Се надевам дека се излечивме, ама ова е ролеркостер. Кога ќе помислиш дека ти е подобро, нешто ново ќе се случи“, објасни пејачката.
„Двајцата имавме симптоми последниве три недели, но и после толку време, тој уште има многу висока температура“, објаснува Пинк.
„Живееме на село и мислев дека овде најопасна работа што може да нè нападне е полен или планински лав, но Џејмисон е многу болен и тоа е застрашувачко. Ова е првпат во последниве 30 години да сум толку исплашена. Имав многу непроспиени ноќи и многу се молев и плачев“, рече Пинк.
Пинк открива дека нејзиниот сопруг и 8-годишната ќерка не заболеле од вирусот.
