Пејачката Мараја Кери се соочува со тужба од 20 милиони американски долари бидејќи со нејзиниот хит од 1994 година, „All I Want For Christmas Is You“ наводно ги прекршила авторските права, пренесува Јутарњи.хр.
Против неа тужба поднел текстописецот Енди Стоун, а покрај Мараја го тужел и кантавторот на нејзиниот хит.
Мараја оваа песна ја сними и објави во 1994 година на албумот „Merry Christmas“, а за време на празниците ова е дефинитивно најслушаната песна.
Меѓутоа, во правните документи поднесени до Американскиот окружен суд во Луизијана, Стоун тврди дека тој бил коавтор на таа песна во 1989 година и дека никогаш не дал дозвола за нејзина употреба.
Во споменатите документи стои дека пејачката и нејзините соработници „свесно и намерно учествувале во кампањата за кршење на авторските права на Стоун за песната“. Се додава дека обвинетите извршиле и „дела на неосновано збогатување со неовластено присвојување на работата на тужителот“, а Стоун за ова бара отштета од 20 милиони долари.
Албумот „Merry Christmas“ беше издаден од Columbia Records на 1 ноември 1994 година. Тој е најпродаваниот американски божиќен албум на сите времиња, продаден во повеќе од 15 милиони примероци ширум светот.
