Кавалџијата Ангеле Димовски, еден од најпознатите во традицијата на македонската музика, е овогодишен добитник на Златна бубамара за животно дело.
Роден е во 1948 во музичко семејство, во кое се негувало свирењето на кавал, гајда, зурла и тапан.
Повеќе од пет децении Димовски е вклучен во широк опсег на музички активности. 40 години помина во РТС како член на Оркестарот на народни инструменти, а во еден период беше и негов раководител. Има снимено повеќе од 10 илјади минути различен музички материјал. Настапуваше во повеќе европски земји, но и во Австралија, Канада и Јапонија.
Познат по своите изведби на народна музика, Димовски со својот кавал имаше голем придонес и кон статусот на албумот „Свјат Dreams“ на групата МИЗАР, како едно од класичните дела во историјата на современата македонска музика.
Музичката традиција во семејството Димовски продолжува и денес преку семејниот оркестар „Шарен кавал“, во кој учествуваат сопругата, ќерката и двата сина, кои настапуваат и во групата „Синтензис“.
