Семејството Панајотови имаат преубав двор во село Секирник, општина Босилово, толку убав што моравме да подзастанеме и да ѝ поставиме неколку прашања на домаќинката, Силвана Панајотова.
Од Силвана дознаваме дека за дворот кој се протега на 2 хектари се грижи самата таа и нејзиниот сопруг. Дворот е царство на чемпресите, оревот, елата, смоквата и јапонската јаболка, а од цвеќињата миризба шират грациозните кампанули, раскошните бугенвили, украсната трева со магични цветови – пампас, бендерите, жолтите туфки и многу други.
– Оваа година нашиот двор е збогатен со прекрасната Калибрахоа, петунија, сарделите, трендафили, каранфил, дрво на животот, раскошната бугенвелија,тука се секако чемпресите кој за нивната форма се грижи мојот сопруг како и за живите огради, и други убавици кои го прават нашиот двор прекрасен – објаснува Силвана.
За убаво уреден двор е потребно пред сè многу љубов, додава таа – „Потребно е и многу грижа, ние со мојот сопруг се грижиме за потребите на цвеќињата и зеленилата, за секое растение што го имаме во нашиот двор. А тие ни ја возвраќат љубовта во бои и го прават нашиот двор рај за очи“.
За Силвана „прекрасно е чувството кога знаеш дека одржуваш нешто во живот, со љубов може сè да се постигне“.
Таа ги следи светските трендови на уредување на двор.
– Најмногу добиваме идеи од апликацијата Pinterest, благодарение на неа научивме многу корисни совети за уредување, но секако дека добиваме идеи и од членките на групата Дворчето кои имаат прекрасни дворови и преубави цвеќиња – вели Силвана.
Кога сме кај предизвиците, нашата соговорничка смета дека со труд и љубов секој двор може да биде убав.
– Најголем предизвик ни е усогласување на времето за работа со одгледување на дворот бидејќи и јас и сопругот сме вработени, но секако наоѓаме време за одгледување и да уживаме во оваа колоритна глетка, да ручаме со нашитие најмили и да пиеме кафе.
Инаку, Силвана е членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
Уживајте во фотогалеријата од прекрасниот двор на семејството Панајотови во село Секирник.
Фото- приватна архива
