Дијана Касмска по професија е професорка по странски јазици, дипломиран филолог, експертка за германски јазик. И иако, гледајќи ги фотографиите, од пределот каде што живее и каде што се наоѓа нејзиниот двор ќе помислите дека се некаква разгледница од Германија, сепак станува збор за Македонија и за селото Будинарци, во општина Берово.
– Дворот не е многу голем, но е мало парче уживање, преубаво за првото утринско кафе – со насмевка нè пречекува Дијана.
За уредувањето на дворот поголем дел од денот се грижи мајка ѝ на Дијана, но секако, и Дијана му се посветува со сета енергија и љубов, секогаш кога пронаоѓа слободно време.
– Секојдневно се посветуваме на дворчето, ги негуваме со потхрана на секои седум дена. За време на најголемиот ек на коронакризата, кога бевме „затворени“ дома, и кога имаше полициски часови, најголемо хоби ни станаа цвеќињата – ни раскажува.
Во дворот доминираат повеќесезонски цвеќиња како сарделите (слезени), петунии, каранфилче и слично. А најголема нивна љубов им се бугенвилиите.
– Бугенвилиите обожаваат сонце и топлина. Тие се совршени и за балкон. За сончеви дворови идеални се и сарделите, иако и со многу љубов и негување успеваат и петуниите – вели Дијана.
Најголем предизвик на Дијана е да може да го направи дворот, еден ден, како рајска градина, цел со цвеќе и зеленило.
– Најубав совет што и јас го имам добиено од една моја многу драга личност, би им го кажала на одгледувачите на цвеќе и обожавателите на Дворчето. „Ако сакаш да бидеш среќен еден ден, напиј се, ако сакаш да бидеш среќен два, три месеци, омажи се /ожени се, ако сакаш да бидеш среќен цел живот одгледувај цвеќе” – советува Дијана и нагласува дека „кое цвеќе и да го одгледувате, секое си носи своја убавина и приказна“.
Инаку, Емилија е членка на Фејсбук групата …ДВОРЧЕТО…, група која ви ја препорачуваме да си станете член и да се изнагледате преубави објави!
Уживајте во прекрасната фотогалерија. И да, Дијана е страсна љубителка на добра фотографија.
Фото – приватна архива
