Симпка, Нела и Смела се трите предлози на Еспресо кој заедно со скопјани се одѕва на повикот на Зоолошката градина да се изберат имиња на трите новороденчиња женски лавчиња кои од денеска тие ќе бидат пуштени во надворешното живеалиште и посетителите за првпат ќе имаат можност да ги видат одблизу.
Зошто ги одбравме овие имиња? Секако, инспирирајќи се од јунаците на омилениот цртан филм за деца (ама и за возрасни!) „Кралот лав“ – Симпка како женска варијанта на бестрашливото лавче Симба, Нела – варијација на името на неговата верна пријателка од детството и гоолема љубов – Нала, и Смела (име што се римува со Нела, но истовремено што е синоним за сè она што го носи Симба во својот карактер и своето големо срце).
Граѓаните, како што соопштија од Зоолошката градина, предлозите ќе може да ги ставаат во пластичните кутии кои се поставени на влезот на Зоолошката градина.
Предлози ќе можат да се пишуваат и во коментар на објавата на фејсбук-страницата на Зоолошката градина, како и на објавата на фејсбук-страницата на Град Скопје.
Анкетата за именување на малите лавици ќе трае една недела, а во текот на следната недела одбраните имиња ќе бидат и јавно објавени.
По повеќе од 20 години, во март годинава во скопската Зоолошка градина се родија три лавчиња. Лавчињата одлично напредуваат под будното око на вработените кои со професионалност и внимание се грижат мајката и малите да се безбедни и да ги имаат сите потребни услови. „Лавчињата ја примија и првата вакцина, како превентивна мерка во ветеринарната заштита на здравјето на животните“, се вели во соопштението.
