Најпознатиот американски рапер, Еминем, на својот инстаграм-профил сподели фотографија од „значката на трезноста“ и се пофали дека веќе 12 години е чист.
„Чисти 12 години, во книги. Не се плашам“, напиша пејачот под фотографијата.
Раперот отворено разговараше за својата зависност. Откри дека знаел да испие и 30 таблети против болки и 40-60 бензодиазепини за смирување во еден ден.
„Не знам точно во кој момент настана проблемот. Се сеќавам само дека сè повеќе и повеќе ми се допаѓаше“, рече Еминем во документарецот „Како да направиш пари, продавајќи лекови“.
На почетокот на 2000 година му се појавиле проблеми со несоница, за време на продукцијата на филмот „8 милји“, кога работел и по 16 часа дневно. Пријател го „запознал“ со „амбиен“, лек кој им помага на луѓето полесно да заспијат, што му било влез кон другите лекови на рецепт.
Самото дно го допрел во 2007 година кога се предозирал со силни аналгетици и синтетски метадон.
„Докторите ми рекоа дека во себе внесов еквивалент за четири кесички хероин. Два часа подоцна да дојдев во болницата, би бил мртов. Ми откажуваа сите органи, бубрези, црниот дроб, сè. Ме ставаа на дијализа и мислеа дека нема да преживеам. Моето дно требаше да биде смртта“, раскажа Еминем за „Њујорк тајмс“ во 2010 година.
Тогаш се зарекол дека веќе никогаш нема да допре дрога, но патот до опоравувањето му бил тежок.
Се откажал од дрогата сфаќајќи дека сака да биде во близина на своите деца додека тие раснат.
Ментор му станал Елтон Џон, кој еднаш или двапати неделно го проверувал за да се увери дека со раперот е сè во ред.
