Изета Беба Селимовиќ, една од најдобрите пејачки или како што ја нарекуваа „кралицата на босанските севдалинки“, почина утрово во Сараево, потврди нејзиното семејство за Федералната новинска агенција (ФЕНА).
Нејзиниот сопруг Џевад Шабанагиќ ја истакна Беба Селимовиќ како чувар на босанската севдалинка, која најмногу ја сакаше, па и го посвети животот и кариерата.
„На најискрен начин, таа го збогати и го сочува нашето нематеријално богатство, како што е босанската севдалинка. Како граѓанин, велам дека нејзиното заминување е голема загуба на нашата културна сцена“ – пренесува Радио Сараево.
Беба Селимовиќ е родена на 27 март 1939 година во Требиње. Ја започнала својата пејачка кариера во Радио Сараево и брзо станала многу популарна. Многумина ја нарекуваа и „дама на севдахот“ заради нејзиниот сериозен и чесен став кон професијата, како и за нејзиното сериозно однесување на естрадата.
