Двајца другари од Радовиш станаа интернет-сензација откако започнаа невообичаен подвиг од малото гратче Радовиш до Монте Карло, пренесува порталот „Слободен печат“.
Иван Младеновски и Спасе Арсов одлучиле да патуваат со автомобил марка „даихатсу сирион“ („Daihatsu Sirion“) од 2007 година дури 1.974 километри. Овој предизвик го поставуваат со една цел да покажат дека и со мал градски автомобил во добра возна состојба може да се стигне каде што се сака, не е потребен секогаш лускуен автомобил.
-Не мора со „ферари“ може и со скромно возило да се стигне до посакуваната цел, потребна е само желба. Ние до оваа идеја дојдовме спонтано летово, автомобилот стои подолго време и одлучивме да си направиме еден забавен предизвик.
Иван и Спасе имаат 22 години и се најдобри другари од детството.
-Во Радовиш добивме огромна поддршка и по пат убаво ни реагираат, но на интернет забележавме некои негативни коментари коишто не нè обесхрабруваат-велат тие.
Патувањето започнало вчера од Радовиш, а го документираат етапно секој километар и дестинација, видеата ги споделуваат на нивните профили на социјални мрежи Фејсбук, Инстаграм и Тикток, каде што можете да ги следите и во живо.
Како што велат, со душа чекаат да го видат нивниот автомобил меѓу луксузниот возен парк во Монте Карло.
