– Денес и утре времето во Македонија ќе се задржи претежно облачно со локални врнежи од дожд и снег на пониските, и снег на повисоките места и на планините, каде снежната покривка и понатаму ќе се зголемува. Во вечерните часови и во текот на ноќта поради понатамошно спуштање на студената воздушна маса од север, локални врнежи од снег ќе има и на пониските места. Ќе дува слаб до умерен ветер претежно од северен и од северозападен правец и истиот долж Повардарието повремено ќе засилува на интензитет. Температурите ќе се искачуваат во интервалот од 3 до 10 степени, додека утре истите ќе бидат пониски и ќе се искачуваат во интервалот од -1 до 8 степени.
Наутро на повеќе места температурите ќе се спуштаат под нулата и истите ќе се спуштаат во интервалот од -6 до 3 степени – вели нашиот метео прогнозер Славчо Попоски.
Во Скопје и околината денес и утре ќе има услови за слаби локални врнежи од дожд и снег, додека температурите ќе се искачуваат во интервалот помеѓу 5 и 6 степени, додека наутро температурите ќе се спуштат до околу 0 степени.
Според Попоски, потоа во текот на новата недела времето ќе биде променливо облачно и студено со умерен, повремено засилен ветер од северен и од северозападен правец. Локално ќе има услови за слабо провејување на снег а минималните температури ќе се спуштаат во интервалот од -7 до 2 степени, додека максималните ќе се искачуваат во интервалот од 0 до 9 степени во најтоплите предели од државава.
